A zamburiña é como o mostruo do Lago Ness, moita xente di que a ten visto, pero a maior parte das veces non é así. Coa denominación "zamburiña", especie bastante escasa sobre todo tendo en conta a demanda nos mercados, adóitanse vender masivamente outras dúas especies, a volandeira e, nos últimos anos, a vieira do Pacífico. A primeira tamén propia de Galicia, a segunda importada de países como Chile ou Perú.

Zamburiña, o Santo Graal dos bivalvos

A zamburiña (Chlamys varia) realmente non é difícil de distinguir das outras dúas especies. A primeira vista xa se pode ver a súa forma mais ovalada e que a cuncha ten moitos máis radios e mais mestos. As "orellas" tamén son moito máis desiguais. Normalmente ten unha cor violácea escura aínda que as cores poden variar, incluso existe unha subespecie "alba".

Volandeira, a "zamburiña" que non é zamburiña

A volandeira (Aequipecten opercularis), a especie que historicamente vendíase no lugar da zamburiña, ten unha forma moito mais redondeada e con menos radios na cuncha. As orellas tamén son asimétricas, aínda que menos ca as da zamburiña. A cor pode ser rosada, alaranxada...

Vieira do Pacífico, gato por lebre frecuente

Vieira do Pacífico (Argopecten purpuratus), dun tempo a esta parte inundou os mercados galegos, importada de América do Sur, e véndese frecuentemente no lugar das verdadeiras zamburiñas. Ao igual ca a volandeira, ten unha forma máis redondeada ca a zamburiña e cos radios menos mestos. Esta especie é importada de América do Sur en tal cantidade que está desprazando a zamburiñas e volandeiras.