A Mancomunidade de concellos do Salnés ven de facer público que o número de turistas que recibiron multiplicouse por dez na última década. Poderíase pensar que este espectacular aumento de turistas levaría consigo un aumento no número de habitantes, atraídos polos postos de traballo que se supuña que deberían crear case un millón de turistas e catro millóns de visitantes, pero non é así, a poboación no Salnés caeu en 1.773 habitantes nos dez últimos anos. Os beneficios do turismo masivo para os veciños, en entredito.

O Salnés perde 1.773 habitantes na última década

Os políticos do Salnés presumen de ter máis vivendas turísticas e prazas hoteleiras ca ninguén, do que non poden presumir é de que isto estea repercutindo na calidade de vida nos veciños. Sete dos nove concellos da zona perderon poboación na última década. A calidade dos postos de traballo que crea este turismo soen ser precarios, mal pagados e limitados aos meses do verán. Pola contra, os prezos dos alugueiros e das vivendas á venda convertíronse en imposibles para gran parte dos veciños da zona que non teñen outra opción que marchar, sobre todo das zonas máis apetecibles para os turistas.

Outros impactos negativos desta masificación turística so Salnés son as molestias por ruidos, atascos, masificación das praias, servizos públicos ao límite por que, como é lóxico, están preparados para 100.000 personas que viven no lugar todo o ano e non para o millón de turistas que reciben no verán, medio ambiente totalmente presionado, sobre todo na costa...

No Barbanza, Muros e Carnota a xentrificación/turistificación tamén está a medrar

Cansados da masificación do Salnés, moitos turistas comezaron a desprazarse cara o norte, á zona do Barbanza, Muros e Carnota, onde a presión turística está a medrar espectacularmente. As consecuencias son igual de negativas que no Salnés, e todos eles tamén están a perder poboación. O turismo non está a ser un motor para fixar poboación na costa galega, ao revés, está expulsando aos veciños dos seus barrios e vilas, desprazados por turistas que, pouco a pouco, van expulsando á poboación local. A xentrificación e turistificación da costa galega xa está aquí. As administracións non poden seguir mirando para o outro lado e considerar un éxito o feito de ter maís turistas que o ano anterior.